KolefnissporKolefnisspor

Samkvæmt skilgreiningu Greenhouse Gas Protocol er bein losun gróðurhúsalofttegunda sú losun sem fyrirtæki geta haft beina stjórn á.

Hjá EFLU er það sú losun gróðurhúsalofttegunda sem tengist notkun bifreiða í rekstri EFLU. Óbein losun EFLU samkvæmt Greenhouse Gas Protocol er af völdum notkunar rafmagns og losun vegna aksturs starfsmanna á eigin bílum og bílaleigubílum á vegum EFLU. Einnig veldur losun vegna flugs starfsmanna óbeinni losun gróðurhúsalofttegunda, sem og meðhöndlun úrgangs. EFLA hefur bætt við upplýsingamiðlun sína varðandi mikilvæga þætti sem eiga við um umfang 3 í kolefnisspori fyrirtækisins, sem sjá má hér fyrir aftan.

Við útreikninga á losun GHL notar EFLA losunarstuðla sem Umhverfisstofnun gefur út reglulega, þegar það á við. Einnig notar EFLA hugbúnaðinn Matarsporið og umhverfisupplýsingar viðkomandi raftækja (e. EPD Environmental Product Declaration), þar sem þær liggja fyrir, sem og aðrar reiknivélar eins og við á, svo sem fyrir flug.

Losun gróðurhúsalofttegunda á hvert stöðugildi var 0,47 tonn CO₂-ígilda árið 2023 og var um 67% lægri en árið 2015 (1,43 tonn CO₂-ígilda/stöðugildi). Loftslagsmarkmið EFLU árið 2023 var að draga úr losun gróðurhúsalofttegunda um 28% í starfsemi fyrirtækisins miðað við hvert stöðugildi, samanborið við árið 2015.

Aðrir þættir í starfsemi EFLU sem fyrirtækið hafði óbein áhrif á árið 2023 eru losun vegna kaupa á nýjum raftækjum (tölvur, skjáir og símar), losun vegna innkaupa á matvöru í mötuneyti í höfuðstöðvum EFLU og aksturs starfsfólks til og frá vinnu. Losun tengd þessum þáttum er um 447 tonn, eða um 1,3 tonn/stöðugildi. Þegar tekið er tillit til þessara viðbótarþátta í óbeinni losun EFLU er losun gróðurhúsalofttegunda á hvert stöðugildi um 1,8 tonn CO₂-ígilda, eða samtals um 608 tonn CO₂-ígilda í heildina. Kolefnisspor EFLU með viðbótarþáttum lækkaði um 47% frá árinu á undan, sem var 3,3 tonn CO₂-ígilda á hvert stöðugildi, en það tengist mikilli losun GHL vegna árshátíðar fyrirtækisins erlendis árið 2022.