Sumarstörf hjá EFLUSumarstörf hjá EFLU

Starfsfólk EFLU starfar í krefjandi umhverfi þar sem verkefnin eru fjölbreytt og síbreytileg. Við sækjumst því eftir að fá kraftmikið og metnaðarfullt sumarstarfsfólk sem er tilbúið að takast á við ný tækifæri og axla ábyrgð í verkefnum.

Hjá EFLU er unnið í fagteymum af ýmsum stærðum og gerðum. Í teymum EFLU eru ekki undirmenn og yfirmenn heldur einkennast þau af lifandi verkaskiptingu einstaklinga með ólíkan bakgrunn, styrkleika og starfsaldur. Þannig fá allir meðlimir teymisins tækifæri til að taka ábyrgð, skiptast á skoðunum og þróast áfram í ólíkum hlutverkum innan teyma. Sumarstarfsfólk er ráðið inn í teymi og fær reynslu af því að vinna í samstilltum hópi einstaklinga sem vinna að sameiginlegum markmiðum og veita hver öðrum stuðning og endurgjöf.

Höfuðstöðvar EFLU eru á Lynghálsi 4 í Reykjavík en auk þess hefur fyrirtækið starfsstöðvar í öllum landsfjórðungum á Íslandi. Við bjóðum upp á störf óháð staðsetningu til að starfsfólk geti unnið í heimabyggð og tilheyrt öflugum teymum um allt land.

EFLA hefur nú starfandi dótturfélög í sex löndum eða í Noregi, Svíþjóð, Frakklandi, Skotlandi, Póllandi og nú í haust var EFLA Aps. stofnað í Danmörku.

EFLA vill bjóða íslensku námsfólki í Danmörku og Svíþjóð upp á þann möguleika að starfa hjá fyrirtækinu þótt það kjósi að búa áfram erlendis að námi loknu. Það getur því unnið áfram hjá sama fyrirtæki kjósi það að flytja síðar aftur til Íslands.